Batuka Tando
Kaba baraliah hanyo lai, baraliah kapado si Gadih Ranti, anak mandeh Siti Fatimah, urang Guci Pincuran Tujuah.
Birawari Gadih Ranti, sadang manumbuak di laman, hari nan sadang tangah hari, sadang bunta bayang-bayang, sadang linduang saliguri, sadang litak-litak ayam, sadang rami urang di balai, paneh nan sangaik garang, lah sirah muko nan putiah, paluah di kaniang batitiakan.
Ado sabanta antaronyo, tampak mamak Datuak Batuah, balari inyo ka ateh rumah, mangambangkan lapiak pandan putiah.
Lah ka rumah mamak kanduang, duduak baselo tangah rumah, sanan bakato Datuak Batuah, “Mano garan mandeh kau, Upiak?”
Manjawab si Gadih Ranti, “Mandeh nan ado di balakang, sabanta lai inyo tibo,” katonyo si Gadih Ranti, sadang bakato jamba ditatiang.
Kununlah si Gadih Ranti, anak nan masak pangajaran, alun disuruah inyo lah pai, alun ditagah alah baranti, capek kaki ringan tangan, muluik manih kucindan murah, pandai mamasak jo manggulai, tahu batanun manirawang, pandai manyulam jo panyuji,
12
