SI NONA MERAH......
105
Kong Liang pegang tangannja Ang Hwa dan eloes-eloes itoe seraja berkata: „kaoe terlaloe merendah, Hwa! Akoe tida perdoeli kaoe asal dari mana, akoe tjinta kaoe!”
Dan sebelon Ang Hwa menjaoet, Keng Liang memeloek lehernja Ang Hwa dan beriken tjioeman di bibirnja jang merah delima dari itoe gadis.
Heran dan kaget serta takoet teradoek mendjadi satoe dalem pikirannja Ang Hwa.
Napasnja Ang Hwa tersengal-sengal, maskipoen ja tida lari-larian.
Ia doedoek bengong dan achirnja merasa, mengapa baroe sekarang Kong Liang berboeat begitoe?
Kong Liang mendjadi sabar lagi dan berkata: „Hwa, kaoe djangan kira akoe patoeng kajoe atawa batoe. Koerang lebih satoe boelan kaoe tinggal di sini, akoe soedah ingin memeloek kaoe, tapi akoe tahanken nafsoekoe. Akoe sering memandang parasmoe jang tjantik terletak begitoe aleman di bantal dengen terkadang kondemoe terlepas, hingga saolah-olah pigoera digoebah lijst prada mas. Tapi saben kali akoe hendak mentjoeri tjioeman, akoe inget, bahoea kaoe terlaloe soetji-moerni boeat diganggoe tangan oesil. Kaoe soedah begitoe pertjaja padakoe, sahingga pintoe kamar selaloe tida dikoentji dari dalem.
Kapertjajaan ini jang akoe tida ingin sia-siaken dan mengendaliken hawa nafsoekoe jang boeroek!”
Ang Hwa entah sengadja atawa tida senderken kepalanja di dadanja Kong Liang, hingga Kong Liang mentjioem beroelang-oelang ramboetnja itoe gadis.
Kong Liang berkata poela: „Besok pagi akoe aken brangkat ka Bogor dan toetoerken semoea ini pada
