52
TJILIK-ROMAN'S
A Lioeng jang soedah ilang sabarnja telah tolak itoe dan berbareng tondjok dadanja Ban Pwee, hingga itoe pemoeda sempojongan dan bertreak: „Adoeh!"
Ia laloe paranin lagi sinshe A Lioeng boeat membales, sedeng moeloetnja memaki.
Bebrapa djotosan jang djitoe dari sinshe A Lioeng bikin Ban Pwee meloso dan bebrapa kali tjioem boemi, hingga doea giginja rontok
Ban Pwee bertambah sengit. Ia mengamoek, tapi belon tangannja sampe di badannja sinshe A Lioeng, kombali Ban Pwee terdjoengkel dan achirnja rebah. di djoebin sebagi bokser „knock out".
Sinshe A Lioeng laloe pegang badannja Ban Pwee begitoe kentjeng, sehingga ia tida bisa bergerak poela dan berkata: „Soeta...... soeta...... goea kila...... ini soeta tjoekoep...... goea koeatit loe nanti mampoet... soeta...... soeta...... ja?"
Ban Pwee sekarang mengarti jang sinshe A Lioeng pande silat, hingga kaloe ia teroes meneroes melawan, bisa antjoer badannja.
„Ja, sinshe...... owe minta ma'af!" berkata Ban Pwee jang berbalik merendah. Ini soedah mendjadi tabeatnja pengetjoet. Terhadep orang jang ia anggep bisa „djengkalin" ia galak boekan maen, tapi koentjoep pada siapa jang brani padanja.
„Goea soeta wilang...... loe jangan main-main sama goea...... loe maoe apa datang sini?"
„Owe maoe ketemoe sama........." menjaoet Ban Pwee sembari melirik pada Mina.
Mina jang soedah kaget dan takoet liat perklaian tadi, sekarang merasa koeatir Ban Pwee boeka resia.
Ban Pwee soedah dapet menebak pikirannja Mina dan sekarang ia dapet djalan boeat memoeasken hatinja, maka lantes berkata: „Owe...... sebetoelnja dateng kemari boeat tengok...... anak owe!"
„Anak jang mana?"
