SI NONA MERAH......
53
„Ang Hwa!"
„He...... apa loe wilang? Loe jadi wapanja Ang Hwa?"
„Betoel, sinshe," menjengir Ban Pwee dengen moeka berseri-seri, maskipoen dari moeloetnja kaloear sedikit darah, lantaran giginja tjopot, „Hing Nio ada mendjadi owe poenja ketjintaan.”
Mina mendjadi poetjet sebagi kertas poetih.
Sinshe A Lioeng menoleh pada Mina dan lantes mengarti doedoeknja perkara. Sekarang ia inget lagi pada apa jang ia soedah doega semoela.
Satelah berpikir sebentaran, ia laloe berkata: „Не, anak moeda, goea kesian sama loe. Goea maoe kasi obat jangan sampe loe poenja moeka begitoe matang wiloe, tapi loe moesti janji woeat jangan loe latang lagi lisini."
„Kenapa?" menanja Ban Pwee dengen heran.
„Itoe goea poenja maoe dan kaloe loe blani latang lagi, loe taoe sendili sadja!"
Sahabis berkata begitoe, sinshe A Lioeng seret tangannja Ban Pwee boeat dibawa ka roemah-obatnja itoe sinshe.
Di sana A Lioeng soeroe Ban Pwee minoem arak-obat dan laen-laen obat, kamoedian ia soeroe Ban Pwee poelang.
Dengen perasaan mendongkol Ban Pwee berlaloe.
Sinshe A Lioeng sendiri dateng lagi di roemahnja njonja Gwan dan nampak Mina sedeng menangis.
„Mina. jangan nangis! Goea soeta taoe lama, Wajingan gede itoe titak nanti wikin soesah lagi. Memang wajingan itoe koelang hasat. Goea nanti jaga sampe Ang Hwa ping-an...... titak oesah koeatit...... tloesah soesah hati....... goea titak wilang njonja Gwan!"
Mina merasa girang dan taoe bagimana baek hatinja ini sinshe.
