SI NONA MERAH......
55
jang ramalken peroentoengan bagoes, asal sadja Ban Pwee robah adatnja jang djelek, teroetama ia moesti berlakoe baek.
Ban Pwee pertjaja „peroentoengan bagoes" aken dateng, tapi ia tida pertjaja, bahoea, itoe moesti, dibarengin dengen prilakoe jang baek.
Sekarang ia dapet satoe akal jang bagoes. Ia poen maoe djadi sinshe kwamia boeat akalin njonja Han.
Dari boeroehnja astana Han" ia dapet kabar, sadjek ditinggal mati soeaminja, njonja Han brenti berdjoedi dan keliatan sedih sadja.
„Ah, ini kabetoelan sekali!" berpikir Ban Pwee dalem hatinja.
Begitoelah ia mengoendjoengin gedong Baron Han dengen lebih doeloe bikin romannja seperti sinshe kwamia, ramboetnja ia adoek-adoek sama poepoer, sehingga djadi seperi orang beroeban. Katja mata item tida ketinggalan dipasang boeat alingin sepasang matanja jang djahat.
Njonja Han satelah meliat sinshe kwamia, maoe masoek lagi, tapi lantes Ban Pwee berkata: „Oeah, engso keliatan banjak soesah, tapi......... tapi lekas nani dapet oentoeng besar!"
Sebagimana biasa orang prempoean lantas ketarik sama omongan manis.
„Doedoeklah, sinshe!" mengoendang njonja Han.
„Trima kasih, engso. Oeah. ini roemah bagoes soenggoean!"
„Sinshe ini ada pranakan Soerabaia atawa dari Negri Tjina?"
„Owe...... he...... he......... sabetoelnja pranakan Soerabaia, tapi soedah 15 taon tinggal di Tiongkok beladjar ilmoe pokwa, kwamia, siangmia dan laen-laen. Dari itoe kendati owe soedah kenjang makan soe-sek-tjay Tiongkok, tida loepa sama sambel goreng Indonesia...... ha...... ha...... ha......!"
