56
TJILIK-ROMAN'S
„Pantes sekali sinshe poenja omongan begitoe lantjar............!"
„Ah...... ah...... djangan terlaloe poedji owe...... marilah owe preksa engso poenja tangan.........!"
Njonja Han sodorken-tangannja pada Ban Pwee.
„Oeah, dasar twa-hokkhie...... ini namanja tangan orang kaja. Begini empoek dagingnja...... koelitnja begini haloes....!"
Njonja Han kena dioempak begitoe. djadi makin tida tjoeriga. Ma'loem orang prempoean selaloe kapingin dipoedji.
„Engso poenja proentoengan sekarang seperti tertoetoep sama awan gelap, pertama lantaran belon brapa lama engso poenja laki meninggal doenia dan kedoea...... ah, owe liat ini goeratan......... poetoes seperti...... ja...... seperti......"
„Seperti apa, sinshe!"
„Djangan goesar, ja, kaloe owe bitjara teroes terang...... sebab banjak sinshe kwamia toekang tipoe. selaloe bilang wagoes, wagoes, padahal djelek. Owe 'ngga bisa tipoe orang. Biar orang tida kasi doeit, tida mengapa, asal apa jang owe bilang itoe teroes dari hati ka hati, makanja owe tinggal miskin, ja...... selaloe miskin, lantaran terlaloe djoedjoer...... ha...... ha...... tida apa...... tida apa. Thikong toeloeng!"
„Boleh bilang teroes terang sadja, sinshe. Saja tida marah!"
„Nah......... ini goeratan poetoes, tapi masih keliatan, djadinja engso poetoes perhoeboengan, tapi masih ada apa-apa jang mengiket."
„Saja 'ngga mengarti sinshe poenja omongan!" berkata njonja Han.
„Hm...... hm...... begini...... engso poenja anak. boekan?"
„Ja!"