60
TJILIK-ROMAN’S
tengah bertereak: „Oeah, tjilaka...... tjilaka!“
„Kenapa?“ menanja njonja Han dengen kaget.
„Sesampenja owe di Djokja, owe dapet sakit keras sampe owe poenja bekelan abis sama sekali. Djadi owe tida ada oeang boeat teroes ka Bandoeng.“
„Kenapa tida lekas kasi kabar, soepaja saja bisa kirim oeang lagi. Tempo hari saja maoe kasi ƒ 50.― sinshe menolak!“
„Ja, siapa kira orang poenja nasib. Laginja owe tida maoe maen minta doeit sadja, sebab bisa ketaoean resia kita ini. Djoega bisa ada sangkaan djelek terhadep engso jang terhormat, boekan?“
„Ai, betoel-betoel sinshe terlaloe hati-hati,“ memoedji njonja Han jang soedah pertjaja mati-matian pada ini badjingan.
Ban Pwee sanget girang jang oempannja memakan. la menjaoet dengen soeara jang merendah: „Ah, owe tida soeka bikin soesah orang. Toehan Allah tida idzinken orang berboeat djahat, boekan? Sabisa-bisanja kita haroes toeloeng jang soesah, biar dapet korma baek!“
Ban Pwee boleh djadi pernah poengoet satoe doea patah perkataan dari boekoe Theosofie atawa sematjem itoe, hingga bisa menjeboet „korma“, sebenernja „karma“, tapi lantaran memang ia tida paham kebatinan, djadi ia inget korma dari Mekka sadja.
„Trimalah ini sedikit oeang!“ berkata njonja Han jang kabetoelan dimedja ada toempoekan oeang dapet dari sewahan roemah-roemah.
Ban Pwee ampir matanja melotot meliat salembar oeang kertas dari ƒ 100.- ditaroh ditelapakan tangannja.
„Wadoeh, terlaloe banjak, engso. Owe tjoema perloe ƒ 10.— sadja boeat beli obat.“
Kombali njonja Han memaksa, tapi kombali Ban Pwee maoe goenaken tipoenja jang haloes dengen
