SI NONA MERAH......
65
Ban Lok poen perhatiken ini dan merasa dengen pasti sedeng berhadepan sama satoe penipoe oeloeng.
Ia bersenjoem dan laloe doedoek deket sinshe tetiron itoe seraja berkata: „Oh, kabetoelan sekali owe djeega maoe minta diliatin peroentoengan owe!“
Maoe atawa tida terpaksa Ban Pwee moesti preksa tangannja Ban Lok.
Kringet dingin mengoetjoer di djidatnja. Ia ambil sapoetangan jang haroem baoenja dan pesoet kringet itoe.
Ban Lok makin merasa geli liat tingkanja sinshe jang ia bisa loetjoetin kedoknja.
Ban Lok mesem, kerna ia tida pertjaja satoe sinshe kwamia atawa pokwa, apalagi katanja dari Tiongkok, bawa-bawa sapoetangan soetra jang haroem baoenja dan biasa digoenaken oleh kongtjoe-kongtjoe idoeng belang.
„En bagimana?“ menanja Ban Lok satelah sakean lama Ban Pwee poeter balik orang poenja tangan dengen ia tida bisa kasih katerangan apa-apa.
„Hm...... sianseng...... poenja istri bakal boenting!“
„Bakal dapet anak lelaki atawa prempoean, sin-she?“
„Anak lelaki jang bakal samboeng toeroenan!“
„Oeah, pinter betoel sinshe Tee It,“ memoedji njo-nja Han. „Kaloe engko dapet anak lelaki, Elly djadi poenja soedara!“
Ban Lok menjesel njonja Han toeroet tjampoer bitjara, hingga sebagian dari maksoednja boeat boeka kedoknja ini badjingan telah gagal.
„Ja...... ja...... owe taoe sianseng poenja anak prempoean. Nah, ini goeratannja!“ berkata Ban Pwee jang sekarang djadi brani!
„Namanja anak itoe siapa?“ menanja Ban Lok.
„Ah, mana owe taoe!“ ménjaoet Ban Pwee.
