SI NONA MERAH......
67
Oemoer toea, ramboet tetep item!” Njonja Han memandang pada ramboetnja Ban Pwee jang soedah loentoer oebannja, sebab poepoernja digosok abis sendiri oleh Ban Pwee.
„Eh, ja, kenapa ramboetnja doeloe poetih, sekarang djadi item?“ berkata njonja Han.
Salebar moekanja Ban Pwee djadi merah seperti api marong.
„Djoega giginja semoea bagoes, tida kentara dia soeda toea. Boleh djadi pinter rawat gigi,“ mengedjek Ban Lok.
Ban Pwee makin bingoeng.
Koemisnja ia eloes-eloes begitoe roepa, hingga miring sedikit.
„Koemisnja poen bisa kaja sajap masin terbang njoengsang!“ menggoda Ban Lok. „Tjoba, owe nanti betoelken.“
Sabelon Ban Pwee mentjegah, koemis itoe telah ditjaboet, hingga bibir tinggi dari Ban Pwee keliatan kelimis.........!
Njonja Han terboeka matanja. Ia sekarang taoe berhadepan sama penipoe.
Ban Pwee hendak angkat kaki, tapi kaboeroe ditjekel tangannja oleh Ban Lok.
„Kaloe loe brani bergerak sedikit, goea kasi bogem mentah sama loe!“ berseroe Ban Lok.
„Ampoen...... ampoen...... engko!“ meratap Ban Pwee, satoe sikep jg biasa dipoenjain oleh pengetjoet.
„Ajo, mengakoe teroes terang, Loe siapa brani tipoe goea poenja soedara!“
„Owe...... Ban Pwee...... dan bener owe soedah taoe ka Bandoeng, liat sendiri Ang Hwa tinggal di sablah roemnahnja sinshe A Lioeng di Tjirojom!“
„Betoel dia pergi ka Bandoeng!“ membenerken njonja Han. „Dari sana dia kirim poitretnja Ang Hwa!“
