SI NONA MERAH......
73
sakit dan berobat sama sinshe A Lioeng. Sinshe jang boediman itoe merasa kasian dan laloe poengoet itoe anak.........!"
Pek Siong djadi bingoeng, sedeng saorang prempoean toea jang mendjadi twai-ienja toean-tanah ini mendengerken pertjakepan itoe di belakang daon pintoe.
Twa-ie ini selaennja tjerewet poen sanget membentji segala apa jang bisa dianggep „kotor" dan „noda", apapoela ia terlaloe bentji pada anak haram. Achirnja Pek Siong berkata: „Sianseng tjeritaken perkara ini dengen maksoed apa?"
„Pertama boeat mendjaga nama kebaekan engko jang terkenal sampe di Soerabaia dan kadoea soepaja djangan sampe engko nanti dapet kasoelitan, sebab engko ada poenja anak lelaki jang oemoernja boleh dibilang sepantaran dengen anak boengah raja itoe. Saorang jang terhormat tentoe tida soeka mempoenjai mantoe jang ternoda, boekan?"
„Trima kasih boeat sianseng poenja kebaekan itoe, tapi tinggalken doeloe ini potret di sini boeat owe mentjari katerangan lebih djaoeh. Kaloe ini semoea ternjata betoel, owe nanti kasih persen pada sianseng jang soedah begitoe baek hati maoe mendjaga kahormatan familie Lie."
„Ha, ini soedah sedjamaknja orang saling toeloeng dan owe tída mengharep segala persenan!"
Ban Pwee kaloear dari gedongnja Pek Siong dengen berbajang lagi banjak ringgitan mengglinding di telapakan tangannja seperti doeloe ia dapet dari njonja Han.
Samentara itoe, Pek Siong pikir boelak-balik hal ini bagimana ia haroes berboeat. Ia tida kaberatan membri makan dan pakean pada anak orang miskin, tapi kaloe darahnja Ang Hwa ada darah boengah raja, sasoenggoehnja ini dapet meroesak nama baek-
