Manjawab si Umbuik Mudo, “Oi Amai joden di amai, indak denai ka sawah ka ladang, umua denai baru satahun jaguang, darah denai baru satampuak pinang, indak pangkua ka taelokan di denai, kunun bajak dangan kabau ka denai iriangkan.”
Mandanga kato nan baitu, hilang aka amai si Umbuik, sanan batanyo hanyo lai, “Jadi haato waang handaknyo, jadi pangulu waang namuah?”
Manjawab pulo si Umbuik Mudo, “Bukan murah urang pangulu, urang pangulu cadiak pandai, tahu di adat jo pusako, tahu di ereang dangan gendeang, tahu maagak maagiahkan, katonyo kato balipek, nan kalah dimanangkannyo.”
Batanyo juo amai si Umbuik, “Kok jadi dubalang lai waang namuah?”
Manjawab si Umbuik Mudo, “Oi Amai joden di amai, bukan murah rang dubalang, rang dubalang kuaik kaba, tagaknyo di pintu mati, nan kareh ditakiaknyo, nan lunak disudunyo, nan jauah ka ditampuahnyo, nan tinggi ka dijuluaknyo, nan bengkok ka dipaluruihnyo.”
“Jadi haato waang handaknyo, jadi pagawai koh tidak,” kato amai si Umbuik Mudo.
“Bukan murah jadi pagawai, nan capek kaki ringan tangan, labiah jago pado lalok, malam basilimuik ambun, siang batuduang awan, bajalan tidak bakaki panek, kok kalam basuluah, kok hujan batuduang, tabaliak disampaikan juo,” katonyo si Umbuik Mudo.
“Kok jadi juaro lai waang namuah, nak tagak di galanggang rang banyak” kato amainyo.
“Oi Amai joden di amai, bukan murah jadi juaro, urang tahu di tuah ayam, tahu mambulang jo mangacak” kato si Umbuik Mudo.
Bakato pulo amainyo, “Pai mangaji lai waang namuah, jadi urang siaklah koh tidak?”
