Marantau
KAN iyo Siti Kalasun, inyo tagalak-galak surang, pado hari nan barisuak, takana laku tadi malam, sakik paruiknyo manahan galak.
Di mano padi tidak taganang
Ayia malimpah dari hulu;
Di mano hati tidak ka sanang
Dapek suami nan katuju.
Kayu kalek mandang di hulu
Ditarah lalu dilampaikan;
Hati lakek sajak dahulu
Di Allah lai basampaikan.
Lorong kapado si Sabarudin, nan bagala Sutan Sari Alam, sajak kawin jo Kalasun, hati gabuak pikiran sanang, dapek basuo kandak hati kawan hiduik tiok hari, maliek bini sangaik sayang, balanjo dibari tidak batimbang, dibalikan kain jo baju, kain baju nan maha bali, barapo harago tidak dietong, nan paralu dapek kandak hati.
Dibaok ka Padang bajalan-jalan, bahari-hari inyo di Padang, hiduik basuko bagadang hati, ado sabuah rintang bagurau, manggaleh lah bakurang-kurang, pokok baransua habih juo, badaman limo tingga tigo, pitih dipinggang licin tandeh, di siko bana nan takana, tabik sasa cilako badan, mampaturuikkan hati sanang.
22
