Tidak salah mandeh manganduang
Salah di anak buruak pinto.
Urang padang mandi ka gurun
Mandi bakusuak buah palo;
Hari patang matohari turun
Dagang baurai ayia mato.
Singkarak kotonyo tinggi
Simatuang mandadau dulang;
Awan bararak ditangisi
Takana kampuang di rantau urang.
Bakato si Malin Saidi, “Pokok baransua habih juo, kok habih pokok baduo, ka mano kito salang tenggang?”
Manjawab Sutan Sari Alam, “Ambo mandanga dari urang, urang Cino mancari urang, untuak karajo tukang roti, elok dimintak kian karajo, tukang roti di Kesawan, sabalah Cino tukang gigi, elok kito bajalan ka sinan.”
Mandanga kato Sari Alam, manjawab si Malin Saidi, “Kalau bak itu kato si Alam, elok sugiro kito kian, pado didahului dek urang lain.”
Sudah sapakaik kaduonyo, bajalan bagageh gageh, di luruihkan jalan Kesawan, diliek suok jo kida, tampak merek tukang roti, disabalah tukang gigi, kan iyo nan baduo, masuak ka dalam kaduo nyo, tampak rang Cino sangat gapuak, dari jauah mambari hormat,
“Manolah Incek tukang roti, bari kami bakarajo, apo karajo indak manantang, asa dapek paruik barisi,” katonyo si Sari Alam.
Tagalak urang Cino nantun, “Kalau namuah bakarajo, dibaok taruih ka dalam,” langsuang bajalan ka dalam, tampak urang mamanggang roti, tampeknyo lapang panjang ka dalam, banyak urang bakarajo, bamacam-macam karajo urang.
44
