Halaman ini telah diuji baca
Kacundang si Palindih
OLAK olainyo Siti Kalasun, samaso malapeh suaminyo, baduo jo mandeh kanduangnyo, alah naiak ka dalam oto, oto pasisia ka Medan, oto bajalan awak tingga, dikaluahkan paruik dikampihkan, hati di dalam nan tidak sanang.
Tingga nagari Bukittinggi
Nak manjalang kampuang palupuah;
Nan pai baibo hati
Nan tingga bahatu rusuah.
Di mano jawi kan kanyang
Bagubalo di tapi jalan;
Di mano hati kan sanang
Sadang kasiah inyo bajalan.
Bajalan babaliak pulang, pulang baduo jo madehnyo, hati di dalam hancua luluah, tagah dek malu jo mandehnyo.
Dari Jati ka Cubadak
Singgah lalu ka Palupuah
Basimpang jalan ka Kumpulan;
Pandanglah api makan dadak
Di dalam lah hancua luluah
Tapi di lua indak mangasan.
48
