Halaman ini telah diuji baca
tidak ado sanang hati, gaji sasuai makan sahari, tidak dapek bakiriman, takana bininyo si Kalasun, tidak lapeh di ruang mato.
- Alang-alang si Malin Deman
- Bari baikua bakapalo;
- Siang digilo angan-angan
- Malam digilo mimpi sajo.
- Rami pakan di Sicincin
- Rami sampai patang hari;
- Banyak pulo urang nan miskin
- Nan labiah bana di badan diri.
- Kalau dibanang-banang bana
- Kusuik suto dalam suri
- Suntiang tasangkuik di palapah
- Banang diambiak ka ragian;
- Kalau dikana-kana bana
- Raso ka laruik, rangkai hati
- Manyarah sajo pado Allah
- Baitu untuang jo bagian.
Bamacam-macam kato hati, salaruik salamo nangko, bakirim tidak batanyo tidak, tantu urang indak sanang, urang dipauik indak batali, antah inyo mintak pasah, mangadu kapado Angku Kali, antah balaki jo urang lain, antah baranak jo urang lain, baitu kato dalam hati, batutua-tutua dalam hati.
- Tidak padi saluluah nangko
- Saheto tangah duo kaki;
- Tidak hati sarusuah nangko
- Bini tingga raso balaki.
- Usah dipungkang buah kalikih
- Elok dijuluak jo nan lain;
- Harok badan mancari pitih
- Bini diambiak urang lain