Pulang
BAJALAN ka carocok kapa, di dalam ayia Sungai Kapuas, elok langkah maso itu, tampaklah kapa Karimata, kapa pasisia ka Sabang, naiak Sutan Sari Alam, si Malin maantakan sampai ka kapa.
Ado sabanta antaronyo, babongka sauah Karimata, kapa gadang kapa Pelni, bajalan kapa hanyo lai, lapeh nan dari batang ayia, handak manjalang lautan basa, lah tampak taluak Tanjuang Periuk, pusek jalo pumpunan kapa, lah masuak ka palabuhan, palabuhan gadang kota Betawi, kapa banyak basusun, di sanan Jenderal Tuan Basa, nan mamacik tampuak nagari.
Kapa banyak ka lua masuak, ado sabanta kapa baranti, maambiak pasisia dari Betawi, bajalan pulo balambek-lambek, tibo di tangah lawitan gadang, hari lah sanjo masok itu, tibo wakatu sumbahyang Magrib, urang sumbahyang dalam kapa.
Lorong kapado Sari Alam, hati sanang pikiran gabuak, tidak saketek mambaok pitih, baribu-ribu pitih tabaok, cukuik ringgik puhun ameh, lah kayo gadang Sari Alam, balasan marasai batahuntahun, hujan jo paneh babalasan.
Tapi sungguahpun nak bak kian, hiduik sarupo ilimu padi, makin barisi makin runduak, lah ampek tahun indak batamu, antah lah mati ibu bapak, antah Siti Kalasun lah mintak pasah, inyo balaki
80
