kampuang, cukuik jo gandang dangan talempong, rabab kucapi tidak tingga, basuko-suko sagalo anak nagari.
Kan iyo sahari itu, ramilah kampuang di urang datang, banyak urang bapangkek nan tibo, sagalo jaksa jo damang-damang, cukuik jo anjuang Tuan Kumandua, pangulu kapalo dalam nagari, tidak ado urang nan tingga, jimek papek kasadonyo, maklum kito tantang itu, Tuanku Damang akan kawin, allahurabbi raminyo urang, babuni motor badarun-darun, baririk oto rang bapangkek, basusun di tangah jalan.
Hari basarang rambang patang, baransua pulang urang nan banyak, patang bajawek dangan sanjo, sanjo bajawek dangan malam, alah malam candonyo hari, dipasang lampu kiri kanan, tarang nan bukan alang-alang, camerlang cahayo tangah rumah, bamacam ulah nan mudo-mudo, kok galak badarai-darai, basuko-suko samuonyo, hari laruik tangah malam, di sanan baru sunyi sanyap.
Birawari Sutan Lembak Tuah, babarapo bulan sasudah itu, diangkek urang jadi pangulu, pangulu andiko pusako lamo, pusako gala sunduik basunduik, sajak nan dari niniak moyang, gala lah lamo tidak bapakai, balipek sajo dalam peti, iyolah bagala Datuak Sinaro Panjang.
Dibaritahu urang dalam nagari, dibunuah kabau dangan bantiang, dibuek alek managakkan gala, maangkek Lembak Tuah jadi pangulu.
Sajak manjadi Tuanku Damang, surau musajik didirikan, banda jo sawah disuruah buek, kapado nan tuo sangaik hormat, nan mudomudo disayangi, kalau bakato lunak lambuik, muluik manih kucindan murah, kasayangan pangulu nan banyak, dipaliharo nagari korong kampuang.
Dek elok asuhan Tuanku Damang, sabuang pupuah sudah baranti, baranti sagalo pajudian, tidak ado maliang jo curi, nagari aman kampuang santoso, taranak kambang padi manjadi.
92
