Dipaluik Ula
Hari nan sadang tangah hari, sadang tangah hari papek, sadang bunta bayang-bayang, sadang linduang saliguri, sadang litak-litak ayam, sadang langang urang di kampuang, sadang rami urang di balai.
Birawari Sutan Lembak Tuah, anak kanduang mandeh Sakdiyah, sadang mamangkua ladang dalam parik, sanan tadanga pakiak urang, pakiak manangih manggaruang panjang, mamintak tolong ka urang lalu.
Dek rang mudo Lembak Tuah, tasirok darah nan di dado, bajalan bagageh-gageh, balari bacapek-capek, hati nan indak sanang lai, diliek cando dipandangi, dilapeh pandang bakuliliang, diliek suok jo kida, tampak rang gadih si Rabiatun, manangih mamintak tolong, diliek cando dipandangi, badan dipaluik ula gadang.
Kan iyo Sutan Lembak Tuah, balari sugiro masuak samak, diambiak cando ula nantun, dielo sakuek tanago, diunjun cando ula gadang, dek untuang tolongan Allah, talapeh sajo ula dari badan, dipangkua ula dibunuah mati.
Agaklah dek Siti Rabiatun, manggigia badan katakutan, lamah sagalo sandi tulang, mukonyo pucek bak kain ganiah.
2
