Bakato Sutan Lembak Tuah, “Manolah rang gadih Rabiatun, mangapo upiak datang ka mari, apo mukasuik dalam hati, manampuah samak masuak rimbo?”
Sanan manjawab si Rabiatun, “Manolah tuan Lembak Tuah, mangko denai datang ka mari, mukasuik sangajo dalam hati, handak mancari ubek mandeh, panawa mandeh kanduang denai, nan sadang dalam sakik, mancari daun kamuniang jantan”.
Mandanga kato nan bak kian, bakato Sutan Lembak Tuah, “Manolah upiak Rabiatun, kok itu cando nan adiak cari, bialah ambo manjapuikkan, ambo tolong mancarikannyo, duduaklah adiak manantikan”, sadang bakato inyo bajalan, bajalan bacapek-capek.
Ado sabanta antaronyo, alah tibo si Lembak Tuah, mambaok daun kamuniang jantan, dek si upiak Rabiatun, diambiak cando daun nantun, gadang hati indak tabado.
Kan iyo Sutan Lembak Tuah, alah sudah daun dibarikan, bajalan babaliak inyo ka ladang, darah di dado turun naiak, mangana ula nan sangaik gadang, kok indak lakeh katolongan, alamat mati si Rabiatun, mati bakubua dalam paruik ula.
Tapi sungguah nan bak kian, tolong karano Allah, indak maharok upah jo jariah, raso di ruang-ruang mato, mangana ula di dalam samak.
Lorong kapado Siti Rabiatun, balari pulang ka rumah, hati di dalam indak sanang, darah tasirok-sirok juo, kok indak lakeh katolongan datang, alamat sansai badan denai, mati di dalam paruik ula, guno jo apo ka dibaleh.
Sadang bakato-kato surang, alah sampai tibo di laman, taruih sakali masuak rumah. Kan iyo mandeh si Rabiatun, maliek cando anak kanduang, bakato inyo kapado naknyo, “Manolah upiak si Rabiatun, heran tacangang badan denai, apolah salah karanonyo, mangko angok upiak kambang kampih, tampan darah indak sanang, baju jo kain kuyak cabiak, di ma garan salah sababnyo?”
4
