Manjawab si upiak Rabiatun, “Usah mandeh salah sangko, janlah mandeh salah siasek, mangko baju ko kuyak cabiak, dangakan bana dek mande kanduang. Lorong kapado badan denai, mancari ubek mandeh kanduang, iyo ka lurah pandan mansiru, malang nan tibo di badan diri, dipaluik dek ula pinggang jo badan, mamakiak denai manggaruang panjang, dek untuang takadia Allah, alamat denai indak ka mati, dapek tolongan tuan Lembak Tuah, inyo mambunuah ula nantun. Kalau ditiliak bangkai ula, ado bagaluang di dalam samak, mati dibunuah tuan Lembak Tuah.”
Mandanga kato nan bak kian, mandehnyo manggeleanggeleang panjang, lah maramang bulu mandangakan, mandanga parasaian anak kanduang, manyasa manyuruah anak kanduang, kok nyampang mati Siti Rabiatun, alamat mandeh mati sasek, anak surang tungga babeleng, indak ado adiak jo kakak, alamat langang rumah gadang, sanan bakato mandeh si Rabiatun.
“Manolah anak si upiak Rabiatun, elok pai japuik Lembak Tuah, iyo ka ranah Kampuang Dalam, kito mandoa surang malin, himbaulah Labai Pakiah Kari, dabiah ayam agak saikua.”
Kan iyo di hari nan barisuak, alah dijalang Labai Pakiah Kari, dituruik cando Sutan Lembak Tuah, dikatokan ujuik mukasuik, handak mandoa mamintak syukur, baitu niat dalam hati.
Lorong kapado Siti Rabiatun, urang nan santun ka ibu bapak, muluik manih baso katuju, pandai barundiang jo bicaro, kasayangan urang dalam kampuang, banyak bakawan samo gadang, pandai manggulai jo manjaik, pandai manyulam manirawang, indak ado manghantikan tangan, pantang batandang ka rumah urang, kok duduak dangan perbuatan, kok bajalan ado ka dituruik, maso kaciak masak pangaja, alah gadang akuan tibo.
Kan iyo samaso itu, dikambangkan lapiak pandan putiah, siriah bareda di carano, ado sabanta antaronyo, tibo Labai Pakiah Kari, duduak baselo tangah rumah, tibo pulo Sutan Lembak Tuah,
6
