mamakai baju batirawang, baju ganiah putiah haluih, takanak sarawa suto hitam, bakain saruang kain jawa, kain jawa nan maha bali, lakek kupiah biludu hitam, sangaik elok dipandang mato, sangaik tampan lakek pakaian, rang mudo pandai mamakai, roman rancak kuniang tasembah, laku elok parangai baiak, jaranglah urang mudo saeloknyo.
Bak roman bak kalakuan, roman cadiak basopun elok, sangaik hormat kapado nan tuo, lagi panyayang ka anak-anak, indak urang bahati bangih, manaruah sayang kasadonyo. Bapantang galak tabahak-bahak, indak ado bakato dareh, indak ado mahantikan tangan, lapeh ka sawah inyo ka ladang, sumbayang mangaji indak tingga, pandai babahua samo gadang.
Lorong kapado Siti Rabiatun, ditatiang hedangan ka tangah rumah, cukuik jo kawa minum kopi, alah sudah nasi tatatiang, makanlah urang kasadonyo, nasi dimakan duo suok, cukuik katigo alah baranti, dibasuah tangan hanyo lai, lah sudah minum jo makan, dikapua siriah di carano, diisok rokok nan sabatang. Kan iyo mandeh si Rabiatun, dibaka kumayan putiah, asok mandulang ka udaro, harum sapanuah rumah nantun, lalu bakato mandeh Rabiatun,
“Manolah Tuan Labai Kari, dibaka kumayan hanyo lai, mamintak kito ka Tuhan Nan Satu, umua panjang rasaki murah, amal ibadah batambah-tambah, anaklah lapeh dari maro bahayo, barakaik tolongan rang mudo Lembak Tuah, guno jo apo ka dibaleh, Allah Taala sajo nan ka tahu.”
Birawari Labai Kari, dibaco doa salamaik, mamintak rahmat kapado Allah, mambari salawat kapado rasul, doa dibaco sangaik panjang, pasailah urang mangaminkan.
Alah sudah Labai mandoa, bakato Labai Pakiah Kari, “Manolah mandeh si Rabiatun, kok mukasuik alah sampai, apo diama alah pacah, minum jo makan alah salamaik, kami mamintak handak pulang, lapeh kami jo hati suci, kami nak pulang hanyo lai.”
8
