Mandanga kato nan bak kian, bakato mandeh si Rabiatun, “Ambo lapeh jo hati suci, sarato muko nan janiah.”
Alah sudah maurak selo, dibari sadakah dangan bareh, untuak dimakan dalam surau, sarato pitih nan babilang, dijawek Labai suko hati, pulang malah inyo lai.
Harialah barambang patang, patang bajawek dengan sanjo, sanjo bajawek dangan malam, alah malam maso itu.
Lorong kapado mandeh si Rabiatun, dipasang dama tangah rumah, dari samalam-malam itu, diliek cando parangai Lembak Tuah, rang mudo anak mandeh Sakdiyah, tidak ado cacek dilatakkan, alah patuik diambiak ka minantu, ka suami anak Rabiatun, bak itu bapikiapikia surang, bakato-kato dalam hati, kok diliek-liek pulo asa usua, urang barasa baiak-baiak, kamanakan dek Datuak Sinaro Panjang.
Ka pasa ka tangah pakan
Mambali kain tanah liyek;
Disiko kaba dihantikan
Nan lain ka kito liek.
10
