Lelo Kayo Dikaru Setan
Habih hari baganti hari, habih pakan baganti bulan, alah
sabulan duo bulan, kan iyo Siti Rabiatun, dek banyak karajo maso
itu, lah panek duduak jo buatan, sanan nak pai ka tapian, iyo ka
lubuak pincuran tujuah.
Diambiak cando kain basahan, bajalan balambek-lambek, dituruikkan labuah nan panjang, ado sarantang pajalanan, cukuik katigo rantang panjang, alah tibo di lubuak tampek mandi, diluluihkan pakaian hanyo lai.
Dibukak baju dengan kain, alah tapasang kain basahan, lah tagerai rambuik nan panjang, rambuik mahitam sampai ka batih, lah tampak langan dangan dado, kulik sarupo pisang dikubak, langan sarupo lilin dituang, mukonyo bulek bak bulan panuah, bulu mato samuik baririang, hiduang mancuang bak dasun tungga, pipi sarupo pauah dilayang, bibia bak limau sauleh, gigi sapantun dalimo rangkah, jaranglah gadih sarancak inyo, banyaklah bujang nan tadayo, maliek tampan rupo awak, sarupo puti turun dari langik.
Lorong kapado si Rabiatun, mandi bakusuak maso itu, disabun badan kasadonyo, alah sudah inyo mandi, dikanakkan pakaian hanyo lai, dilapiah abuak nan tagerai, dipasang badak pado muko, rancak nan bukan alang-alang, bak puti dari kahyangan, bajalan inyo babaliak pulang, iyo ka rumah mande kanduang.
12
