Bajalan baunduang-unduang, baunduang-unduang bugih haluih, hari nan sadang rambang patang, surang tidak urang nan lalu, langang kampuang maso itu, iyo juo bak kato urang, manjadi mamang di urang tuo, mujua nan datang tiok ari, malang nan datang sakijap mato, alah tibo di parak pisang, sanan dikaja di urang mudo, iyolah Sutan Lelo Kayo, anak dek Datuak Bandaro Kuniang, kamanakan Angku Lareh dalam kampuang.
Dek urang mudo Lelo Kayo, hati lah dikaru setan, mabuak bacinto pado gadih, hati nan tidak dapek ditahan, malu jo sopan indak ado, tidak ado sagadang awak, awak kamanakan lareh panjang kuku, kok gadang nak malendo, kok cadiak nak manjua. Sanan bakato si Lelo Kayo, “Mano kau gadih si Rabiatun, marilah ka mari adiak kanduang, kasiah lah lamo pado adiak, elok di siko kito sampaikan, usah adiak balari juo.”
Mandanga kato nan bak kian, takunci muluik si Rabiatun, darah di dado turun naiak, dingin badan maso itu, diliek urang indak ado, indak kamano ka mintak tolong, sanan bakato si Rabiatun,
“Tuan denai Lelo Kayo, tidak elok bakato nan bak kian, malu kito di urang banyak, suruikkan hati ka nan bana.” Mandanga kato si Rabiatun, galak tabahak si Lelo Kayo, diambiak cando didakeki, dipagang tangan kaduonyo.
Maliek rupo nan bak kian, manangih Siti Rabiatun, dicubo lari indak dapek, tangannyo kareh mamacikkan, alah pasai elo maelo, lah pueh tagang batagang, mamakiak cando Rabiatun, bagolek-golek dalam samak, baju di badan cabiak-cabiak, dek elo maelokan, dek ayun maayunkan, lah mamakiak juo mintak tolong, lah hilang aka si Lelo Kayo, dek untuang takadia Allah, tibo di sinan si Lembak Tuah, diliek cando dikajari.
Bakato Sutan Lembak Tuah, “Mano Tuan Lelo Kayo, apo parangai nan bak nangko, malu kito di urang banyak, sagan kito di urang kampuang, adat di mano Tuan pakai, laku sarupo anjiang
14
