gadang, mamaga kapado anak kamanakan, parik paga dalam nagari, usah paga makan tinaman.”
Mandanga kato nan bak kian, malompek cando si Lelo Kayo, diayun langkah disiapkan, didorong gadang si Lembak Tuah.
Kan iyo Sutan Lembak Tuah, urang pandeka sajak dahulu, disambuik kaki dilacuikkan, dicubo langkah nan tigo, diayun disipak ditarajang, tibo dipusek Lelo Kayo, kaki tibo inyo malanguah, sadang malanguah balari panjang, takuik dibunuah si Lembak Tuah.
Maliek cando Rabiatun, ibo ati si Lembak Tuah, diantakan pulang ka rumahnyo, alah tibo di laman, bakato si Rabiatun, “Manolah Tuan Lembak Tuah, usah Tuan babaliak pulang, mari ka rumah makan dahulu, Tuan lah payah manolong denai”.
“Bialah ambo pulang dahulu, kok ado dalam hajat badan, di lain hari ambo ka mari, insyaallah babaliak juo, “katonyo Sutan Lembak Tuah.
Sadang bakato maadok pulang, lalu bajalan hanyo lai, iyo ka rumah mandeh kanduang, hari lah malam maso itu.
Kan iyo Siti Rabiatun, bakato inyo ka mandehnyo “Oi mandeh joden di mandeh, elok bana laku si Lelo Kayo, samantang inyo kamanakan lareh, mambari malu kapado denai, baju di badan cabiakcabiak, kapalo panuah di tanah liyek, ngilu sagalo pasandian, kok indak tibo Tuan Lembak Tuah, alamat badan dapek malu, laku bak setan jo anjiang gadang, parangai ateh dari babi di rimbo,” bakato sadang manangih, aia mato bak maniak putuih talinyo, basahlah pipi kaduonyo.
Mandanga kato anak kanduang, camehlah hati mandeh kanduang, tasirok darah di dado, diliek anak dipandangi, rambuik kusuik baju lah cabiak, muko balumang dangan tanah, manangih mandeh malieknyo, sanan bakato mandeh kanduang,
“Manolah anak kanduang denai, elok anak di rumah sajo, usah anak bajalan jauah, lorong kapado si Lelo Kayo, kamanakan dek lareh
16
