panjang kuku, urang kuaso dalam kampuang, jikok mambunuah indak mambangun, apo dibuek indak dilarang, urang bagadang-gadang surang, takuiklah kito anak kanduang, usah tabatiak tabarito, kok tahu cando Tuanku Lareh, alamat kito ka marasai.
Dangakan malah anak kanduang, sabab bapak anak nan mati, bukan mati sampai aja, mati basabab bakarano, inyo marasai kanai tangan, diguluang jo kaki tiok malam.
Sajak marasai kanai tangan, badan nan indak elok lai, gilo panyakik bakapanjangan, sampai bacarai nyawo di badan.
Lorong kapado lareh kito, usah disingguang dipangakan, kok tibo bangih baliau tu, alamat umua akan singkek, tambahan lai anak kanduang, lorong kapado Tuanku Lareh, bantiang jo kabau lareh juo, “katonyo mandeh si Rabiatun, bakato sadang kacamehan, dek takuik kapado Angku Lareh.
Mandanga carito mandeh kanduang, sakik hati Siti Rabiatun, banci mandanga lareh nantun, parangai sarupo ayam gadang, tidak ado manaruah ibo, tidak ado manaruah sayang, kok gadang suko malendo, kok cadiak handak manjua.
Urang padang mamunta banang
Dipunta dilipek ampek
Dilipek dipaduo;
Indak elok dirantang panjang
Elok dikumpa dipasingkek
Diambiak sajo nan paguno.
18
