Batimbang Tando
Kan iyo mandeh si Rabiatun, sajak mandanga kaba buruak, di
sanan hati tak sanang lai, duduak bamanuang-manuang surang,
panjang pikiran maso itu, diliek anak sudah gadang, alah patuik dibari
bakawan, dibari suami ka junjuangan.
Di hari nan sahari itu, dijalang mamak Datuak Tungga, sarato adiak Sutan Palimo, dihimpun sakali niniak mamak, lah rapek papek di tangah rumah.
Bakato mandeh si Rabiatun, “Manolah mamak adok adang, lorong kapado si Upiak Rabiatun, kok diliek dipandangi, umualah cukuik tujuah baleh, diliek badan sudah gadang, dipandang cando rupo jo roman, alah patuik dicarikan suami, ka junjuangan si upiak Rabiatun, carilah di mamak ka sumando, mato baniah di badan kito.”
Mandanga kato nan bak kian, bakato Sutan Palimo, “Manuruik pikiran badan denai, kok diambiak Haji Amat baanyo, inyo urang kayo dalam kampuang, basawah babidang-bidang, banyak manaruah ameh jo perak.”
Mandanga kato nan bak kian, manjawab cando Datuak Tungga, “lorong kapado Haji Amat, bana inyo urang kayo, banyak manaruah ameh jo perak, tatapi salah parangainyo, indak katuju pado denai, haji nan sangaik rambang mato, gilo babini tiok tahun,
20
