lapeh surang baganti surang, itu karajo bakapanjangan, patuik ka bapak Rabiatun. Usah diharok kayo urang, elok nan lain kito cari, nan samo mudo jo anak kito, pandang anak pandang minantu.”
Bakato pulo Sutan Parpatiah, “manuruik pikiran badan ambo, usah nan lain kito cari, eloklah si Muncak Ujuik, anak kanduang Datuak Nagari Basa, urang kayo pandai mamakai, lah patuik itu kito ambiak, “katonyo Sutan Parpatiah, mamak kanduang Siti Rabiatun.
Manjawab pulo Sutan Palimo, “lorong kapado Muncak Ujuik, urang manjo sajak ketek, ka sawah ka ladang indak pandai, manggaleh haram kalau bisa, urang pamaleh sajak dulu, rintang babilang katitiran, gilo malapeh alang-alang, indak tahu di labo rugi, pitih nan utang mamaikan, manjo di mandeh ibu bapak, balanjo diagak diagiahkan urang.”
Bakato baliak Datuak Tungga, “lorong kapado carian denai, elok diambiak anak mandeh Sakdiyah, iyolah Sutan Lembak Tuah, pandai ka sawah jo ka ladang, pandai manggaleh tangah pakan, rupo baiak kalakuan elok, kok itu rang mudo kito ambiak, urang bujang alun babini, tapi sungguah nan bak itu, pulang maklum pado mandehnyo.”
Sanan manjawab mandeh si Rabiatun, “kok itu Datuak katokan, ambo sapaham nan bak kian, tolongnyo banyak ka Rabiatun, elok itu kito japuik.”
Sapakaik urang maso itu, surang tidak ado nan mambantah, samo suko kasadonyo, bulek mupakat maso itu, dicari manti nan piawai, pandai batutua jo bicaro, tahu dikieh dangan bandiang, jikok bakato lamah lambuik, kalau batutua muluik manih.
Kan iyo mandeh Rabiatun, banyak urang maminang anak kanduang, surang idak ado nan suko, elok diambiak nan bajuluak, daripado maambiak barang nan rareh.
Lorong kapado Siti Rabiatun, mandanga sajo di dalam rumah,
22
