hati nan samak-samak ragu, mandanga urang bamupakaik, darah di dado indak sanang.
Baru mandanga namo Lembak Tuah, baminyak muko kasukoan, sajuak pikiran maso itu, sukolah hati indak tabado, kasiah tatumpah sajak dahulu, di muko nan indak kalihatan, pandai mambuhua indak mambuku, sajak samaso datang mandoa, kasiah lah tadorong ka Sutan Lembak Tuah.
Kayu kalek madang di lurah
Ditarah lalu dikampihkan;
Hati lakek pandang lah sudah
Di muko indak mangasan.
Salasiah di Bangkahulu
Tumbuah nan dakek kayu kalek;
Kasiah bapalun sajak dahulu
Dikalokkan sajo dalam hati.
Pulau pandan jauah di tangah
Di baliak pulau angso duo;
Hilang badan dikanduang tanah
Guno si Lembak takana juo.
Birawari mandeh si Rabiatun, sajak mupakaik dalam rumah gadang, dicari hari nan baiak, dihituang-hituang palangkahan, dihimbau manti amai Rapiah, urang cadiak candokio, pandai barundiang kieh jo bandiang, urang nan arif bijaksano, tahu di ujuang kato sampai, takilek ikan dalam ayia, lah tantu jantan jo batino.
Alah datang amai Rapiah, duduak basimpuah tangah rumah, dek mandeh si Rabiatun, lalu bakato maso itu, “Manolah kakak amai Rapiah, iko siriah makanlah dulu.”
Lamo sabanta antaronyo, ditatiang nasi dek Rabiatun, cukuik jo kopi daun kawa, sarato ayia basuah tangan. Kan iyo amai Rapiah, dimakan nasi hanyo lai, disuok nasi sasuok, cukuik katigo inyo lah kanyang, dibasuah tangan hanyo lai.
24
