Alah sudah minum jo makan, dikunyah siriah di carano, sadang duduak basiriah siriahan, sanan bakato mandeh kanduang,
“Manolah upiak Rabiatun, pai ka laman lah dulu, karano kami handak barundiang, indak elok didanga urang.”
Mandanga kato mandeh kanduang, digigik bibia maso itu, manahan galak kasukoan, baguluik lari ka halaman, hati nan harokharok cameh, harok raso ka mandapek, cameh raso indak dapek.
Bakato mandeh si Rabiatun, “Manolah kakak amai Rapiah, jikok barundiang sudah makan, kalau baranti lapeh arak, baitu adat nan biaso. Mangko dihimbau kakak ka mari, ado mukasuik dalam hati, mukasuik gadang pado kakak, tolonglah ambo kini juo, iyo juo bak kato urang, kalau batutua jo nan pandai, kalau bajalan jo nan tahu. Apo pikiran kakak ambo, satantang dari anak kito, diliek roman dipandangi, rasolah patuik dibari bakawan, tampek junjuangan anak kito, iyolah si upiak Rabiatun.
Lorong kapado calon suami, manuruik kato Datuak Tungga, elok diambiak anak kakak Sakdiyah, di ranah Kampuang Dalam.” Baitu kato mandeh si Rabiatun.
Manjawab cando amai Rapiah, “Manuruik pikiran ambo surang, samo saujuik malah kito, samo sapaham malah awak, lorong kapado Lembak Tuah, urang bujang elok laku, pandai ka sawah jo ka ladang, pandai manggaleh tangah pakan, kok dapek kironyo Lembak Tuah, patuik sapadan jo anak kito.”
Alah sudah barundiang, lah banyak batutua dangan kato, bakato mandeh si Rabiatun, “Manolah kakak Amai Rapiah, elok bajalan kini-kini, sadang nan hari balun tinggi, karajo baiak dilakehkan, usah ditimpo di nan buruak, ikolah siriah dalam kampia.”
Kan iyo amai Rapiah, diambiak siriah dalam kampia, lalu bajalan bagageh-gageh, alah sarantang pajalanan, cukuik kaduo rantang panjang, hampia ka tibo hanyo lai, alah tibo garan di sanan, iyo di rumah mandeh Sakdiyah.
26
