Kan iyomandeh Sakdiyah, alah tampak amai Rapiah, bakato inyo maso itu,
“Cubadak tangah laman
Dijuluak jo ampu kaki;
Usah lamo tagak di laman
Itu cibuak basuahlah kaki.”
Manjawab amai Rapiah,
“Cubadak tangah laman
Diambiak nak rang kampuang ranah;
Mangko den tatagun di laman
Den sangko kakak indak di rumah.
Nak duo pantun sairiang:
Bukan denai Kinari sajo
Kinari nak rang Padang;
Bukan denai kamari sajo
Gadang mukasuik ka dijalang.”
Manjawab mandeh Sakdiyah, “Manolah amai Rapiah, naiaklah malah dahulu, lapiak sudah dikambangkan.”
Alah naiak amai Rapiah, lah duduak di tangah rumah, bakato amai Rapiah, “Ikolah siriah ambo baok, kunyahlah siriah malah di kakak.”
Alah sudah basiriah-siriahan, sanan bakato amai Rapiah.
“Manolah kakak mandeh Sakdiyah,
Luruih jalan ka Kinari
Basimpang jalan ka Muaro
Di sanan banyak batang lado;
Mangko den datang ka mari
Denai disuruah disarayo
Manjapuik Lembak ka sumando.
28
