Balayia kapa tantang Tiku
Dihampeh ombak diambuangkan
Tampak nan dari kampuang Dusun;
Kok buliah pintak balaku
Lembak diambiak ka junjuangan
Ka suami Siti Rabiatun.”
Mandanga kato nan bak kian, bakato pulo mandeh Sakdiyah,
“Babelok jalan ka Tiku
Basimpang jalan ka muaro;
Kakak mananti malah dahulu
Ambo batenggang jo bicaro,”
Katonyo mandeh Sakdiyah, “Dibaok mupakat malah dahulu, kapado mamak jo bapaknyo, kok ado kato saukua, kato sapakaik niniak mamak, basaba kakak agak sabanta, mananti rundiangan nan saiyo. Sungguahpun nan bak kian, lorong kapado Lembak Tuah, gadangnyo karano di ruweh, umua baru satahun jaguang, aka kurang pikiranpun singkek.”
Manjawab pulo amai Rapiah, “Manolah kakak mandeh Lembak Tuah, karajo baiak dilakehkan, usah ditimpo di nan buruak, elok sugiro paguluikkan.”
Manjawab mande Sakdiyah, “Insyaallah baiaklah itu.”
Alah sudah inyo barundiang, mamintak izin ka bajalan, bajalan bagageh-gageh, alah sarantang pajalanan, cukuik kaduo rantang panjang, alah tibo inyo di rumah, iyo di rumah mandeh Siti Rabiatun.
Lorong kapado amai Rapiah, dicurai dipapakan parundiangan, mandanga kato nan bak kian, sanang hati kaduonyo.
Alah sudah tibo maso itu, janji buatan nan dahulu, dicubo babaliak hanyo lai, iyo ka rumah mandeh Sakdiyah, alah sudah tibo di rumah, duduak barundiang di rumah gadang, siriah dimakan
sakapua surang.
30
