Sanan bakato mandeh Sakdiyah, “Kok kahandak ado balaku, kok pintak raso lai ka buliah, tapi sungguah nan bak kian, mamintak janji agak sabulan.”
Mandanga kato nan bak kian, sajuak pikiran maso itu.
“Kok itu pintak kakak, ambo tarimo jo hati suci, tapi sungguah nan bak kian, elok kito timbang tarimo, jawek kain timbang tando,” katonyo amai Rapiah, diuluakan kain cindai suto, dituka dangan cincin ameh, ka ganti kabek buhua arek.
Kan iyo samaso itu, ditatiang nasi dek Sakdiyah, mandeh kanduang Lembak Tuah, alah sudah minum jo makan, mamintak izin ka bajalan, bajalan cando amai Rapiah.
Alah tibo di rumah mandeh si Rabiatun, sanan bakato amai Rapiah, “Manolah kakak mandeh si Rabiatun, kalau mukasuik alah sampai, mananti kito barang sabulan, baitu janji jo buatan.”
Mandanga kato nan bak kian, sananglah hati sajuak pikiran.
Urang Padang mamunta banang
Dipunta dilipek ampek
Dilipek dipaduo;
Indak elok dirantang panjang
Elok dikumpa dipasingkek
Diambiak sajo nan paguno.
Ka pasa ka tangah pakan
Mambali kain tanah liyek;
Di siko kaba dihantikan
Nan lain ka kito liek.
32
