Sudah buatan jo sukatan
Indak buliah batangguah lai.”
Bakato pulo Tuanku Lareh, “Manolah Datuak Angku Kapalo, kito cari lantai tajungkek, kito buek titian barakuak, supayo inyo tak jadi kawin, dicari aka jo kalaka, kok tidak marasai Lembak Tuah, bukan den manjadi Tuangku Lareh.”
Ado sabanta antaronyo, dapek pikiran maso itu, handak mancilakokan Sutan Lembak Tuah, dituduah maliang dalam rumah, iyo di rumah Haji Amat, nan kahilangan pakan dahulu. Lah dicari sudi jo siasek, sampai kini balun basuo, tidak ado tando jo beti, hilang sahilangnyo sajo.
Bakato Tuanku Lareh, “Manolah Datuak Angku Kapalo, baa pikiran pandapek Datuak, tantang kahilangan di rumah Haji Amat, kok ditadiang alah tarateh, umpang-umpang alah takanak, taranglah inyo kamaliangan, salapan hari sampai kini, tidak ado usua pareso, kaba tidak barito tidak, malu kito jo Tuan Kumandua, dapek buruak kasudahannyo, alah duo pucuak surek datang, manyuruah cari si pamaliang.”
Manjawab Angku Kapalo, “Manolah Tuanku Lareh, lorong kapado nan mamaliang, hilang aka badan denai, lah banyak sudi jo siasek, kapado urang nan runciang tanduak, dijapuik pakso samo sakali, surangpun tidak tando jo beti.”
Bakato pulo Angku Lareh, “Kok itu Angku katokan, dimano urang maliang namuah mangaku, salah bana tu angku Datuak.
Kini baitulah nan ka rancak, suruah japuik Sutan Lembak Tuah, anak dek mandeh Sakdiyah, buliah dipuruak dibanamkan, buliah dibuek asuang pitanah, dicari saksi duo urang, dibuek tando beti, diupah urang jadi saksi.”
Mandanga kato nan bak kian, galak tabahak Angku Kapalo, sudah maklum dalam hati, kilek camin alah ka muko, kilek baliuang
alah ka kaki.
38
