Kan iyo Angku Kapalo, bakato surang dalam hati, sangaik jaheknyo Tuanku Lareh, namuah mambusuakkan urang elok, asa mandapek gadih rancak, indak ado ibo kasihan, indak manaruah hati saba, tapi sungguahpun nan bak kian, awak di bawah parintah urang, kato lareh tak buliah disanggah, bakato sabuah sadang, manggayuang sakali putuih, cadiak nan tidak paguno.
Birawari Sutan Lembak Tuah, sajak putuih timbang tando, sananglah hati maso itu, sajuak pikiran indak tabado, kok padan alah diukua, janji nan sudah ditakuak, mananti sajo kutikonyo.
Lorong kapado Siti Rabiatun, sananglah hati tidak takiro, pucuak dicinto ulam tibo, uranglah rami dalam rumah, gilo manjaik jo manyulam, satangah mamasak kue, diangsua karajo nan ringanringan.
Kayu kalek madang di lurah
Diambiak nak rang Saruaso;
Hati lakek pandang lah sudah
Mananti sajo kutikonyo.
Salasiah batimbo jalan
Tumbuah dakek banang mansiang;
Kasiah nan tidak dapek ditahan
Raso dikuyak hari siang.
Kan iyo Lembak Tuah, hati harok pikiran sanang, sadang duduak tangah rumah, di dalam rumah gadang mandeh, pikiran malayang-layang juo, malang nan tidak dapat ditulak, mujua nan tidak dapek diraiah.
Kan iyo samaso itu, lah tibo dubalang jo angku kapalo, manjapuik Sutan Lembak Tuah, japuik tabaok maso itu, indak dapek batangguah-tangguah, tidak buliah mailak-ilak.
Sanan bakato Angku Kapalo, “Mano dubalang jo upeh nagari, baoklah Sutan Lembak Tuah, lakekkan palanggu basi, usah waang
balalai-lalai, sabalun hari tinggi bana, baoklah ka gaduang Bukittinggi,
40
