masuakkan ka dalam paseban, barikan surek ka Angku Jaksa, buliah pakaro dipareso.”
Mamalang di pamatang sawah
Dapek baluik duo tigo;
Lah malang Sutan Lembak Tuah
Dalam tunangan sansaro tibo.
Dek rang mudo Lembak Tuah, kato nan tidak dapek dijawab, parentah kareh Tuanku Lareh, mangaluah ramuak dalam hati, dinanti sajo apo nan tibo, disarahkan untuang pado Allah.
Hari nan sahari nantun, heran tacangang urang nan banyak, apo sabab karanonyo, apolah salah Lembak Tuah, mangko dibaok ka Bukittinggi, urang mudo nan elok baso, kasayangan urang dalam kampuang, pandai babahua samo gadang, kini dibuek sarupo urang maliang, diikek dikabek arek, dibaok ka dalam tangsi.
Lorong kapado mandeh si Lembak, maliek anak lakek palanggu, manangih manggaruang panjang, anak kanduang sibiran tulang, apolah salah karanonyo, mangko anak nan bak kian.
“Anak denai usah dibaok, anak nan tidak ado basalah, tidak bacarai dangan ambo, bukannyo inyo urang jaek, tidak palakak jo palakuih, tidak pancuri jo parampok,” katonyo mandeh Sutan Lembak Tuah, ayia mato bak maniak putuih, malacuik-lacuikkan diri, mahampeh-hampehkan badan.
Maliek mandeh Lembak Tuah, manangih urang samuonyo, ibo maliek parasaian. Lorong kapado Lembak Tuah, sajak ditangkok dalam rumah, sampai masuak ka paseban, bamanuang surang dalam tangsi, dicari sagalo salah badan, apo sabab karanonyo.
Biduak sakoci rang Tiakan
Si Akuik namo nangkodohnyo;
Kalau dikana untuang badan
Apolah salah karanonyo.
42
