Alah sudah minum jo makan, sanan bakato Lembak Tuah, “Manolah adiak Rabiatun, kito bajalan kini juo, bajalan ka rumah mandeh Adiak, mandeh lah lamo manantikan.”
Kan iyo samaso itu,bajalan turun Siti Rabiatun, diantakan jo
oto Lembak Tuah,ado sabanta antaronyo,alah tibo cando di laman,
diliek kiri jo kanan,tampak mandeh sadang manjamua, manjamua
padi di halaman.
Maliek cando mandeh Rabiatun, balari mangaja anak
kanduang,kan iyo samaso itu,bakato mandeh kanduang,“Manolah
rang mudo Lembak Tuah,naiaklah dulu ka rumah buruak denai,”
balari dahulu ka ateh rumah,dikambangkan lapiak pandan putiah,
lamo sabanta antaronyo, talatak nasi tangah rumah.
Bakato Sutan Lembak Tuah,“Lorong kapado makan minum,
kamilah makan sabanta nangko,makan baduo jo Rabiatun,di rumah
mandeh di kampuang Dalam.
Kan iyo mandeh Rabiatun, “Manolah anak Lembak Tuah,
dimano dapek pangkek damang, cubo tarangkan pado mandeh.”
“Kununlah itu pintak mandeh, buliah dicurai dipapakan,
lorong kapado parasaian badan denai, sajak batulak dari kampuang.”
Ditarangkan pulo sagalo parasaian, sampai manolong anak kanduang
Tuan Residen di Batawi, sabuah tidak ado nan tingga, sampai
manjapuik Siti Rabiatun.
Mandanga parasaian Sutan Lembak Tuah, kadang-kadang
manaruah rusuah, kadang-kadang bagalak-galak, sanan bakato Siti
Rabiatun, “Dangakan di mandeh, mulo batamu jolong basuo, inyo
sarupo urang mintak sadakah, kaki bakabek sabalah kida, sarupo
urang kanai tukak, pakaian buruak kuyak-kuyak, ruponyo nak
mancubo hati denai.”
Mandanga kato nan bak kian, riuahlah galak tangah rumah,
mandangakan curito Lembak jo Siti Rabiatun.
80
