— 180 —
saija boleh saija boewang itoe djimat Hoeij To, aken tetapi sablonnja sajja boewang dan saija minta Tjiangkoen mengangkat soempa lebih doeloe jang brat.
Maka barang Lo Tong denger lantas berpikir di dalem hatinja: ija djikaloe kita maoe soempa bohong itoe ada gampang, lebih bae sekarang kita bikin bodo padanja. Maka Lo Tong sahabisnja berpikir lantas mendjawab kata: — Jadjikaloe Kiongtjoe hendak minta saija soempa baelah, djikaloe saija berdjoesta bitjara pada Kiongtjoe biar saja nanti mati di toembak oleh panglima jang toewa oemoer 80 tahon, maka Lo Tong bersoempah begitoe oleh kerna Lo Tong pikir masa kita orang bole mati di toembak pada panglima jang oemoer 80 tahon kerna panglima jang begitoe oemoernja tiada mampoe bikin kita binasa.
Satelah To Louw Kiongtjoe mendenger jang Lo Tong soeda kloewarken dia poenja soempah, Jantas di dalem hatinja mendjadi girang maka dia poenja djimat Hoeij To lantas dia boewang di dalem soengei jang dalem maka To Louw Kiongtjoe lantas berkata: hei Kongtjoe, sekarang saija hendak poera-poera lari harep Kongtjoe bole soesoel dari blakang nanti saija toeloeng pada Kongtjoe boeat toeloengin baginda radja soepaija terlepas dari kota Bok Jang Shia.
