— 185 —
berkata kapada Tjouw Kie Loen: — Ja Goanswee kenapa Kiongtjoe ini hari dia poelang lagi, heran kenapa dia tiada maoe mendjaga disitoe, apa itoe maksoednja ?
Tjouw Kie Loen: — ja baginda, dari hal itoe hamba ada koerang preksa tjobalah nanti hamba adjak dia masoek. Maka waktoe itoe dengen sigrah Tjouw Kie Loen kloear samperin pada To Louw Kiongtjoe, serta kliatan To Louw Kiongtjoe dateng maka Goanswee Tjouw Kie Loen lantas berkata: — ja Kiongtjoe baroe dateng, saija Tjouw Kie Loen dengen hormat aken menjamboet sekalian saija harep Kiongtjoe soeka bersama-sama saija aken masoek ka dalem boeat katemoe-in pada baginda radja.
To Louw Kiongtjoe: — baiklah, maka kadoea orang itoe lantas bersama masoek ka dalem kraton. Apabila To Louw Kiongtjoe sampe di dalem lantas berloetoet di hadepan radja serta panggil : — Tjianswee Tjiantjianswee.
Demikian radja Po Kong Ong meliat Kiongtjoe mengadep dengen sigrah laloe menanja: — he, sekarang akoe menanja kenapa sekarang ini angkau lekas poelang dengen meninggalken benteng di tandjakan Oeij Liong Nian, apa begimana itoe merk „Tong Tiauw" poenja bala bantoean sampe begitoe gagah sekali, maka sampe kita poenja panglima jang begitoe gaga-gaga telah binasa
