— 251 —
Apabila Thia Kauw Kim denger begitoe lantas tertawa laloe berkata: ja sa-oemoer kita idoep di dalem doenia blon perna liat ada ini orang jang pengabisan djelek.
Soe Taij Naij: — ja memang ini saija lagi djato di latjoer, maka dapet anak begini matjem, sekarang saija tiada laela pengharepan melaenken maoe simpen padanja di atas loteng menoenggoe dia poenja hari mati sadja lantas saija maoe koeboerken.
Thia Kauw Kim: — he djangan soedara bikin dia mati, lebi bae kasi dia kawin sadja!
Serta Soe Taij Naij denger begitoe lantas tertawa besar laloe berkata: wala eh! siapa si jang kepengenan padanja, kaloe satoe anak lelaki maoe kawin tentoe maoe tjari bini jang tjané parasnja. masa maoe jang sebagi setan colera poenja roepa sekarang tiada laen melaenken toenggoe dia poenja hari mati sadja.
Thia Kauw Kim: — ja soedara hal itoe djangan boeat slempang hati saija nanti toeloeng kasi kawin dan saija maoe djadi tjomblangnja kerna ada satoe orang hartawan poenja Kongtjoe serta toeroenan orang bangsawan.
Soe Taij Naij: — he djikaloe orang hartawan dan bangsawan tentoe maoe tjari mantoe orang jang tjakap dengen srentanja, maka dia maoe pada ini anak jang pengabisan djelek!
