— 69 —
To Louw Kiongtjoe bawa 200,000 soldadoe lantas koeroeng itoe kota Bok Yang Shia.
Komedian di dalem kota Bok Yang Shia radja Lie Sie Bin doedoek di Gin Loan Tian kratonnja Tjouw Kie Loen dengen berpoeloe reboe soldadoe ada di dalem dan ada jang kasi lapor kepada radja Lie Sie Bin dengen berkata: ja radja di 4 moeka pintoe kota moesoe soeda djaga kras.
Koensoe Tjie Bouw Kong laloe berkata ja sekarang soeda tjilaka kena moesoe soeda akalin, sekarang ramsoem tiada bole masoek begimana?
Oetti Kiong berkata: ja Koensoe, baik naek di atas kota boeat liat glagatnja?
Gwanswa Tjin Siok Po menjaoet: ja Tjiang-koen itoe ada betoel, masing-masing naek di atas kota dengen iringin radja, Lie Sie Bin toenggang dia poenja koeda dengen di pajoengin, kloear dari kraton Gin Loan Tian naek ka atas kota, srepta radja Lie Sie Bin liat dari atas kota laloe menjeboet: ajo mati lah ini sekali! kerna moesoe kliwat angker, radja Lie Sie Bin dengen panglimanja liat moesoe begitoe, masing-masing kloearin lida.
Gwanswe berkata: ja sekalian tjiangkoen liat .ini moesoe boekan sadja orangnja banjak, sebab dia poenja barisan dengen pekakas koeat, ja sekarang kita soesa boeat kloear masoek, di loear ramsoemnja sampe banjak, kita kena di koeroeng
