— 668 —
jang boleh djadi nanti dateng, paling baek sekarang, sedeng moesin Tjhoen soeda moelai, kita pergi tjari ajahkoe di Saij-Pak: kerna satoe bribahasa poen ada bilang ; „ sablonnja oedjan baeklah orang sedia pajoeng.” Ja, begitoelah akoe moesti ambil poetoesan, kerna sebagimana kau taoe, pada sablonnja dateng kamari, memang akoe soeda berniat boeat pergi tari Tjhian-swe di Saij-Pak.”
„ Kaloe Siotjia soeda pikir tetep boeat bikin itoe perdjalanan,” kata Hong Dji dengen girang, „baeklah akoe lantas sediaken apa jang perloe, soepaja begitoe lekas dapet hari jang baek, dengen sigra kita boleh berangkat. Sasoenggoenja djoega, kenapatah kaloe orang lelaki boleh mengoembara, orang prampoean tida ? Toch lelaki dan prampoean sama-sama ada manoesia ! Apa lagi orang prampoean jang sebagi kita, soeda tentoe tida nanti bisa dapet Soesa di djalan. Tapi Siotjia, maski poen akoe merasa girang nanti bisa bikin itoe perdjalanan, dimana kita aken dapet berbagi-bagi pamandangan, jang nanti tambaken pengatahoean kita boekan sedikit, toch traoeroeng ada djoega hal apa-apa jang kedja hatikoe bimbang.”
