— 670 —
di tempat djaoe ada dapet katjilakaän apa-apa, biasanja orang jang djadi sanak-soedaranja jang paling deket bisa dapet firasat lebi doeloe.
Begitoelah djoega soeda kadjadian dengen Ko Siotjia. Sedeng ini nona pikirken ajahandanja, adalah orang toea itoe, jang lantaran hendak oendjoek kasetiaännja saboleh-boleh pada karadjaän Song, soeda dapet tjilaka oleh kerna kasetiaännja itoe di laen negri.
Song Sie sasoeda bikin ilang koeda
laloe melariken diri. — Lu Kok
Tjaij dapet djalan boeat poeasken
kadengkiannja
Seperti soeda ditjeritaken di bagian atas, tatkala Ko Keng kirim Ya Loet Tong jang ia dapet tawan ka kota Radja, itoe koetika Pak-An-Ong atawa Radja di Saij-Pak soeda menaloek, dan soeda djoega seraken satoe soerat perdjandjian perkara wates negri. Tapi sebab itoe koetika begimana boenjinja soerat itoe blon ditoetoerken, maka baeklah kita tjeritaken sakedar di bawa ini.
Dalem itoe soerat perdjandjian telah ditetepken soengei Hek Ho ada djadi watesnja kadoea negri: Tepi sebla Oetara masoek bilangannja negri Kim (Saij-Pak), samentara
