— 679 —
„Akoe boekan menoedoeh !” begitoelah kamoedian ia berkata poela: „Tapi kau sendiri poenja kelakoean soeda paksa akoe mendoega djelek begitoe ! Kaloe bener kau ada bekerdja sebagi soldadoe berkoeda di kota Gan-Boen-Koan, begimanatah sedeng kawan-kawanmoe masi ada di sana, kau sendiri sadja bisa tenga malem poelang kamari? Tjobalah djawab !”
Song Sie tida menjaoet, kerna tida brani toetoerken apa Jang mendijadi sebab, hingga ia kapaksa lari poelang ka kota Radja.
Lantaran begitoe itoe kapala ronda tentoe djadi semingkin tjoeriga, hingga dengen tida banjak bitjara lagi, ia lantas prenta kawannja iket itoe korban aken dibawa pada toeannja.
Sabentar lagi Song Sie soeda dibawa masoek ka dalem astananja Lu Kok Tjaij, sedeng ini dorna doedoek minoem sama-sama tiga Selirnja dalem satoe paseban.
Tempo djoeroe lajan kabarken, bahoea Tjhong Jong atawa itoe kapala ronda jang melakoeken djoega pakerdjaän mandoer besar di itoe gedong minta bertemoe, itoe mantri dorna jang berhati binatang lantas soeroe silaken itoe hamba masoek, samentara tiga goendiknja itoe ia prenta berlaloe sabentaran.
