— 698 —
kata Song Sie, „aken tetapi dari lantaran ini tempo keada'ankoe ada begitoe soesa, inilah kepaksa akoe ambil djoega. Trima kasi.”
„Itoe perkara kau teroesa pikirin”, kata Lu Siang, „sebrapa bisa akoe maoe bikin kau djadi sa-orang jang beroentoeng......”
Sedeng kata begitoe, ini pembesar doerhaka berpaling pada Lu Jong, ia kedipken matanja sebagi membri tanda apa-apa dan kata: „Akoe rasa Song Sie ada sanget tjape, sebab perdjalanan dari kota Gan Boen Koan sampe kamari boekannja dekat; itoe di medja makan ada katinggalan stenga botol arak jang akoe biasa makan, pergilah ambil dan kasi Song Sie minoem satoe doea tjawan, soepaja bisa ilangken tjape.”
Lu Jong sampe mengarti maksoed prenta toeannja. Ia memanggoet teroes masoek ka dalem, kaloear kombali dengen bawa stenga botol arak bersama satoe tjawannja.
„Toewangin dan kasi Song Sie minoem”, mamerenta itoe pembesar pada pengawalnja, „arak itoe ada sanget baek, minoem satoe doea tjangkir bisa ilangken tjape dan kasi kaloear hawa djelek di dalem badan.”
Satoe tjawan soeda lantas di-isi penoe dengen isinja itoe botol, Lu Jong sigra angsoerken itoe pada Song Sie, jang menjamboet ini pembrian dengen kelakoean goegoep.
