— 715 —
Menanja Sie Long Boen Kim jang dari tadi tinggal diam sembari menghamperi.
„Perkara apatah soeda terdjadi atas dirinja itoe generaal, jang soeda kira-kira doea poeloe taon lebi kita orang tiada bertemoe?" la menanja lebi djaoe.
Souw Gie-soe laloe bri taoe, pada ini kawan sedjabat, perkara apa ada ditoedoe atas dirinja Ko Teng Tjan berhoeboeng dengen pengadoeannja Song Sie.
Ketrangannja itoe pembesar membikin Sie Long Boen Kim djadi bengong terlongong-longong, sampe sakoetika lamanja ia tiada bisa berkata-kata. Tapi kamodian sembari gojang kepala ia kata: „Biarpoen begimana djoega, akoe tiada maoe pertjaja kaloe Tin Kok Ong ditoedoe ada mengandoeng niatan chinat; Song Sie tentoe boekan orang baek-baek, boleh djadi ia soeda trima sogokan dari saorang jang bermoesoe pada Ko Kong, soepaja dengen itoe djalan ia bisa roeboeken moesoenja!"
Boekan maen kagetnja Lu Kok Tjaij setelah de'nger omongannja Sie Long Boen Kim, jang soeda menebak dengen begitoe djitoe. Di itoe sa'at moekanja ini dorna djadi meringis. Tapi sebab ia ini soeda pande dan biasa, lagi moekanja soeda tjoekoep tebel, begitoe lekas soeda bisa tetapken hatinja, hingga membikin orang tiada menaro doegaän djelek.
