— 721 —
dalem orang poenja pikiran. Antara laen-laen ia bilang jaitoe satoe malem ia soeda masoek ka dalem gedong pekarangan Ko Kong di mana ia mengintip dari selat djendela, koetika itoe Generaal lagi doedoek berdoea'an sadja sama Pak-An-Ong. Bagi orang jang berpikiran sehat bisa lantas membri kepastian, jang Song Sie poenja pengadoean begitoe sama sekali tiada masoek diakal; ia tjoema djadi soldadoe koeda, di mana bisa kaloear masoek dalem gedongnja Goanswe, apapoelah dalem waktoe malem begitoe dan djoestroe, ini saloe hal bikin hamba poenja hati tiada pertjaja. Aken tetapi, sebab hal ini ada oeroesan besar, maka tiada laen djalan, selaennja bertaoeken pada toeankoe.“
„Tapi, apa kau soeda djalanken pepreksa'an sebagimana moesti atas dirinja itoe pendakwa?“ menanja baginda.
—„Soeda. Malahan hamba soeda rangket doea poeloe lima rotan.“
—„Abis begimana?“
—„Ja tinggal membandel. Itoe hoekoeman jang begitoe heibat, sampe koelit anggotanja petja tiada membikin ia moengkir dari penoedoeannja.“
Satelah denger ketrangannja Souw Toan, Baginda Sin Tjong tinggal diam dengen tiada berkata satoe apa. Tiada sa-orang mendapet taoe perkara
