— 729 —
mata, itoe dorna titaken Lu Jong ambil arak; di itoe tempo, lantaran sanget girang bagi perdjandjian-perdjandjian jang di hatoer oleh Lu Kok Tjaij, loepalah Song Sie pada bahaja-bahaja jang terindar di itoe waktoe, ia tjoema inget sadja itoe perkata’an perkata’an dorna, jang aken membikin beroentoeng dirinja di kamodian hari.
Dengen tiada singkat-singkat, malah dengen kapertjaja’an paling besar atas dirinja itoe dorna, Song Sie soeda tenggak setjawan arak jang Lu Jong kasiken pada maleman itoe.
Djoestroe lantaran perboeatan di atas, Song Sie sengadja anterken djiwanja sendiri!
Itoe arak jang di minoem oleh Song Sie, jalah ada di tjampoerken oleh saroepa boeboek beratjoen jang di namai: „Koan Tjo San” atawa obat ketawa: Lu Kok Tjaij dapetken itoe obat dari saorang pertapa’an di Tong Laij, obat mana ada paling banjak menoeloeng dalem ia poenja berbagi-bagi pakerdja’an kedji. Barang siapa jang makan itoe obat, orang itoe aken selaloe girang dan goembira; tetapi di dalem tempo toedjoe hari orang itoe aken binasa. Ini sobat bisa bekerdja dengen aloes, begitoe aloes sampe orang jang kena makan tiada dapet merasa apa-apa; bekerdja dalem oetjoes dan oerat-oerat jang penting dalem anggota menoesia, bikin brenti mengalirnja dara sampe orang itoe mendjadi mati.
