— 750 —
jang begiloe gaga perkara, sebagi Tin Kok Ong. Aken tetapi, djoestroe lantaran terlaloe toea kapertjajaän dan mengilonin, hal itoe bisa menerbitken kakliroean dan katjilakaan pada diri sendiri. Saperti djoega toean-toean bertiga, akoe poen boekan kenal baroe sama itoe panglima besar, dan kliroe sekali kaloe orang bilang: akoe tiada oe ia poenja jasa-djasa jang penting bagi negri."
„Ja, bitjara teroes, Sinsiang, „kata Baginda tempo ini mantri keparat bitjara sampe di sitoe, „kasilah dengen kau poenja pikiran, soepaja ini oeroesan tiada mengambil banjak tempo.”
„Sekali-kali hamba boekan maoe mengoetaraken pikiran, tapi kaloe hamba soeda berkata begitoe, adalah sakedar boeat membetoelken kakliroean jeng diterbitken oleh tiga kawan sadjabat ini:” djawab ini dorna jang memang sanget pande maen komedi: „Sekarang. biarlah Baginda idjinken aken hamba bitjara pada marika."
Sablonnja Baginda sempet berkata-kata, ini djahanam hadepken moekanja pada Po Kok Kong dan jang laen-laen, orang jang mana sekarang ia dapet kanjataän: ada mendjadi rintangan jang aken menghalangken ia poenja kahendak.
„Dengerlah, Som-wie Hiankoan,“ begitoelah ini dorna berta lebi djaoe: „Akoe ini sekali-kali boekan djadi orang penoendjangnja Song Sie, atawa diam-diam maoe bantoe mengeniaja Tin Kok Ong.
