— 757 —
apa-apa jang perloe di bawa dalem perdjalanan toeannja. Teroetama The An Gin, itoe generaal poenja pengikoet jang setia; ia bikin bresi sela dan laen-laen perabot toenggang koeda, sedeng koeda toenggang jang perloe di pake, soeda di kombong seantero malem.
Esoknja segala apa soeda sedia. Sasoedanja menghatoerken slamat tinggal pada pembesar jang menggantiken pakerdja’annja, bersama oetoesan radja Ko Kong brangkat djalan. Ampir semoea ponggawa dan soldadoe di Gan Boen Koan koetjoerken aer mata tempo liat generaal pergi. Kasedian jang di rasa oleh marika itoe, adalah kasedian jang paling soetji; ia orang taoe Ko Kong ada sa-orang baek, jang sebegitoe lama soeda memimpin marika dengen kewadjiban dan kebedjikan jang tiada watesnja. Sekarang dengen mendadak itoe pembesar jang baek di panggil poelang, begimanatah hatinja tiada maoe djadi piloe dan toempaken aer mata. Apa lagi kaloe di inget pembesar jang mewakilken blon di kenal baek atawa tiada dan bisa mengoeroes seperti marika poenja toean jang lama atawa tiada.
Begitoe poen rahajat negri merasa kailangan, seperti anak kailangan bapa, berhoeboeng dengen berangkatnja Ko Kong. la orang bertjampoeran sama koempoelan soldadoe toeroet pergi menganter, jang sampe brapa blas paal baroe kombali.
